مقالات

زاهر بخيت الفكي يكتب : فضيلي ود عمك حسن..!!

فضيلي ود عمك حسن..!!
كيفِن نلوم نحن الزمن ..؟
نشكيهو نلعن في الظروف
قصتنا أبداً ما الزمن
القصة خوف
من بُكرة والظن ما حسن
في رب رحيم خالق رؤوف
ياريتنا نحسِن فيهو ظن
الخالق البارئ العطوف
أرزاقنا عندو اتقسّمن
من قبلِ ما نسمع نشوف
شماعة الزمن الظروف
صبحت تعاني من الوقوف
يا سيدي هدّاها الوهن
من الزمن..زمن المحن
ولادنا بدفعوا في التمن
فضيلي ودعمك حسن
كان أحلى شاب
فنان يمُوسِق في الحروف
بيناتنا قاعد في العقاب
سانِد الأم الرؤوم
حارِس رباب
أبوهو تاه في الاغتراب
ما ظِن يعود
من تاني يرجع للوطن
مرت سنين لا رنّة منو ولا خطاب
فضيلي ذااااتو حليلو غاب
مع شلة من أسوأ الصحاب
شيشة دُخان والشراب
الآيس الخرب الشباب
يسرقِ يبيع للبنقو يقبُض للتمن
باع العفش ماخلى باب
الوالدة ماتت بالغُبُن
إسبوع كمان ماتت رباب
مسكينة ضاعت بالحُزُن
فضيلي جاري ورا السراب
نهايتو كانت اكتئاب
مجنون صِبح ضاع الشباب
كيفن نلوم نحن الزمن..؟
الجريدة

المصدر من هنا

قد يعــجبــك أيضاَ

زر الذهاب إلى الأعلى